dr ferdinand isch gstorbe
ojeh ojeh ojeh 
dr ferdinand isch gstorbe
es tuet mer hütt no weh
är wo so vil het gworbe
um liebi im quartier,
dr ferdinand isch gstorbe
das arme tier

win i doch geng mys goudi
am ferdinand ha gha
eson e stolze moudi
wird nie meh öpper ha
geng d'liebi het ne tribe
nie ds müüs- und vögelfah
är isch mys vorbild blibe
dä chatzema

wen är sys unbeschwärte
ganze läbe lang
het gsungen i de gärte
und nüt als minnegsang
de ischs im albe glunge
ds härz z’rüere vo sym schatz
är het für d'chatze gsunge
doch nid für d'chatz

so het är ou am gröschte
nachwuchs ds läbe gschänkt
das tuet eim albe tröschte
wo as sys stärbe dänkt
e huufe fedinändli
spaziere no dür d’stedt
sit das ne dr her brändli
erschlage het

teil lüt me sött se strafe
verschliesse ds härz dr kunscht
si wei geng nume schlafe
und hei ke sinn für brunscht
so het ou dr her brändli
mit emne topf für d'nacht
däm arme ferdinändli
es ändi gmacht

dr ferdinand isch gstorbe
ojeh ojeh ojeh 
dr ferdinand isch gstorbe
es tuet mer hütt no weh
är wo so vil het gworbe
um liebi im quartier,
dr ferdinand isch gstorbe
das arme tier